EIC Accelerator

Berrikuntzarako Kontseilu Europarraren (EIC) EIC Accelerator ekimen nagusietako bat da Horizonte Europaren esparruan, potentzial teknologiko handiko startup eta ETEak bultzatzeko diseinatua. Bere misioa da berrikuntza disruptiboak merkaturatzeko trantsizioa bizkortzea, Europako enpresei lagunduz inpaktu globala duten soluzio aitzindariak eskalatzen.

Berrikuntza teknologikoa hazkundearen motorra den mundu honetan, EIC Accelerator deeptech teknologiak garatzen ari diren enpresetara bideratzen da, arrisku-maila handia izan arren eraldatzeko potentzial izugarria duten enpresetara. Adimen artifizial aurreratutik hasi eta energia garbi edo bioteknologiaraino, EIC Accelerator-ek berrikuntza horiek hasierako fasetik maila globalean merkaturatu arte eramateko beharrezkoak diren baliabideak eman nahi ditu.

Programa enpresen finantzaketa-beharretara egokitzen da, garapen-fasearen arabera:

• Dirulaguntza (Grant-only): 2,5 milioi eurorainoko laguntza ordainketa bakarreko modalitatean, tarteko garapen-faseetako berrikuntza-jardueretarako (TRL 6-8), laguntzak gehienez 24 hilabeteko iraupena du.
• Finantzaketa konbinatua (Blended finance): modalitate honek 2,5 milioi eurorainoko dirulaguntza eta 0,5 eta 10 milioi euro arteko equity inbertsioa konbinatzen ditu. Aukera hori berrikuntzarako zein hazkunderako finantzaketa behar duten enpresentzat pentsatuta dago.
• Inbertsio esklusiboa (Investment-only): enpresa ertainek erabil dezakete, baldin eta proiektuak azkar eskalatzeko fasean badaude (TRL 9) edo aurrez dirulaguntza bakarra jaso badute. EICk, modalitate honen bidez, 0,5 eta 10 milioi euro arteko inbertsioa eskaintzen du, eta kopuru handiagoak eskuratzeko aukera ematen du STEP ScaleUP programaren bidez.

EIC Acceleratorrerako hautaketa-prozesua potentzial handiena duten proiektuak identifikatzeko diseinatuta dago. Hiru fase ditu:

1. Proposamen labur bat aurkeztea: hasierako eskaerak proiektuaren laburpen exekutiboa, gehienez 10 diapositibako pitch deck bat eta 3 minutuko pitch bideo bat izan behar ditu. Eskaera hori edozein unetan aurkez daiteke, eta hilabete bakoitzeko lehen asteartean taldekatu eta bidaliko da, ebaluatzeko. Taldekatze-datatik aurrera, emaitzak 4 eta 6 aste arteko epean jakinaraziko dira, gutxi gorabehera.
2. Urruneko ebaluazioa: proposamen laburra positiboa bada, hurrengo urratsa proposamen oso bat aurkeztea da, gaian adituak diren pertsonek ebaluatuko dutena.
3. Elkarrizketa EICko epaimahaiarekin: ebaluazio positiboa izanez gero, elkarrizketa batera gonbidatzen da enpresa, eta elkarrizketa horren ondoren, startupak edo ETEak EICren finantzaketari buruzko erabaki positiboa lor dezake.

Programa bi kategoriatan banatzen da, eta bakoitzak helburu espezifikoak ditu:

• EIC Accelerator Open: edozein teknologia- edo sektore-eremutako proiektuei irekia, aurrez zehaztutako lehenespen tematikorik gabe.
• EIC Accelerator Challenges: EBren erronka estrategikoekin bat datozen proiektuei zuzenduta dago, hala nola osasun digitalari, energia garbiari edo adimen artifizial aurreratuari.