EU Startup Summit 2026

EU Startup Summit, que celebra a súa 12ª edición no Mediterranean Conference Centre de Valletta (Malta), consolídase como un dos eventos máis destacados para a comunidade emprendedora europea. Este encontro reunirá persoas expertas en tecnoloxía, líderes da industria, startups, corporates e persoas investidoras de todo o continente, ofrecendo unha plataforma única para conectar, aprender e colaborar.

Ao longo do evento, compartiranse os avances máis relevantes no ámbito das startups, cun enfoque nas tendencias emerxentes do mercado, o impulso da innovación e a colaboración estratéxica entre empresas emerxentes e axentes clave do ecosistema tecnolóxico. Ademais, será un espazo ideal para fortalecer alianzas, explorar novas oportunidades de investimento e potenciar o crecemento internacional das startups.

Durante o evento, as persoas participantes terán a oportunidade de asistir a charlas, paneis de discusión, keynotes e workshops distribuídos en dous escenarios, coa participación de máis de 80 speakers. Así mesmo, contarase coa presenza de destacados perfís internacionais do ecosistema emprendedor e investidor, como Hadi Moussa, CEO de Oyster; Alexandru Stan, fundador e CEO de tekpon e novo CEO de TNW; Stephanie Melodia, fundadora e ex CEO de Bloom; Ridwan Olalere, fundador e CEO de LemFi; Conor Moynagh, Head of VC en HubSpot for Startups; e Andrei Duduoiu, CEO e cofundador de SeedBlink, entre outros.

O encontro incluirá ademais unha pitch competition con 15 startups early-stage seleccionadas entre máis de 1.600 candidaturas, así como unha zona expositiva con 75 compañías innovadoras e un espazo específico para a conexión con firmas de venture capital a través da iniciativa Investors on Stage.

Durante a súa última edición, confirmaron a súa asistencia máis de 2.500 participantes, entre os cales se atopan 1.200 founders e 300 persoas investidoras.