Slush 2025

Slush 2025 é o evento de startups deseñado para conectar a persoas emprendedoras con axentes investidores e medios de todo o mundo. Esta 18ª edición, organizada anualmente en Helsinqui, ten como obxectivo acadar a máxima relevancia: cada asistente forma parte dunha comunidade coidadosamente seleccionada que inclúe startups de alto potencial, axentes investidores cun volume de activos baixo xestión de 4 billóns de dólares e medios internacionais de referencia.

Durante dúas intensas xornadas, os asistentes poderán acceder a máis de 400 mesas de reunións, á Slush Matchmaking Tool, asistir a charlas en catro escenarios de primeiro nivel con relatores de talle mundial e participar en máis de 600 eventos paralelos por toda a cidade.

A experiencia complétase con actividades exclusivas como mentorías, Investor Office Hours, encontros privados para startups e axentes investidores, e unha afterparty que fomenta o networking nun ambiente relaxado.

Slush é un evento agnóstico en canto a industrias (industry-agnostic), con representación de máis de 50 sectores, desde deeptech, IA (Intelixencia Artificial) e fintech ata enerxías limpas, gaming e healthtech. A atmosfera é única: 1 axente investidor por cada 2 persoas fundadoras, un contorno que favorece o diálogo directo, a aprendizaxe práctica e a creación de alianzas estratéxicas.

Na edición de 2024, asistiron máis de 13.000 asistentes de máis de 70 países, incluíndo máis de 6.000 startups, 3.500 axentes investidores e 1.700 axentes do ecosistema, xerando 20.000 reunións en só dous días.