Programa de apoio á entrada de investidores privados en empresas innovadoras con alto potencial de crecemento

O Instituto de Fomento da Región de Murcia lanzou unha nova convocatoria para este 2025 dirixida a financiar proxectos empresariais. O programa ten como finalidade atraer a persoas investidoras que demostren capacidade de achegas particulares e experiencia en promover o desenvolvemento de empresas innovadoras de recente creación con alto potencial de crecemento. Así mesmo, o programa ten como principal obxectivo impulsar o desenvolvemento de pemes na rexión, promovendo a innovación, a internacionalización e a mellora da competitividade das empresas emerxentes.

Esta convocatoria está aberta a empresas de calquera sector, excluíndo aquelas dedicadas á produción primaria de produtos da pesca, acuicultura e agrícolas. Disponse dun crédito total dun millón de euros para financiar os proxectos, que deberán realizarse nun prazo máximo dun ano desde a concesión da axuda.

Os proxectos subvencionables poderán ser algúns dos seguintes:

• Proxectos de innovación de produto ou proceso: desenvolvemento de novos produtos, procesos ou servizos, ou mellora dos existentes, incluíndo prototipos, deseño ou redeseño de produtos, procesos, envases ou embalaxes, cun impacto relevante na cadea de valor da empresa.
• Proxectos de investimento produtivo: apoio a proxectos de investimento en activos materiais e inmateriais relacionados coa creación de novos establecementos, expansión de capacidade, diversificación de produción ou transformación fundamental de procesos en establecementos existentes.
• Proxectos de dixitalización da xestión e prestación de servizos da empresa: proxectos tecnolóxicos que melloren a competitividade mediante a implementación de tecnoloxías para a transformación dixital de produtos, servizos, procesos ou modelos de negocio. Inclúe o desenvolvemento de aplicacións informáticas e adquisicións de propiedade intelectual.
• Proxectos de promoción, lanzamento e posicionamento de produto ou servizo, que poden incluír accións para comunicar, informar e dar a coñecer a existencia dun produto ou servizo ao mercado ao que vai dirixido.
• Proxectos de internacionalización de produto ou servizo: proxectos enfocados no diagnóstico da competitividade da empresa e o seu potencial para internacionalizarse, a elaboración e execución de plans de márketing internacional, e accións para abrir novos mercados ou introducir novos produtos.
• Outras tipoloxías de proxectos que impulsen o crecemento e a innovación da nova empresa que poidan establecerse na correspondente convocatoria.

A axuda, que se outorga como subvención a fondo perdido, ten unha contía máxima de 180.800 € por persoa beneficiaria, e a súa intensidade máxima pode alcanzar ata o 100% do gasto subvencionable, dependendo da rolda na que se atope o proxecto. As roldas subvencionables son pre-semente, semente e serie A, e as condicións varían segundo a tipoloxía de rolda:

• Rolda Pre-semente: subvención de 10.000 euros sobre os primeiros 10.000 euros investidos máis un 10% das cantidades adicionais achegadas.
• Rolda Semente: subvención de 25.000 euros sobre os primeiros 160.000 euros investidos máis un 7% das cantidades adicionais achegadas.
• Rolda Serie A: subvención de 73.300 euros sobre os primeiros 850.000 euros investidos máis un 5% das cantidades adicionais achegadas.

As achegas realizadas polas e os investidores privados poderán ser en forma de capital, prima de emisión ou nota convertibles.

Os custos elixibles para os proxectos inclúen os custos de persoal, os gastos por colaboracións externas, os gastos de viaxes de prospección e asistencia a eventos, os investimentos en activos materiais e inmateriais e os custos indirectos, que poderán alcanzar ata un 7% da suma dos custos elixibles do proxecto.

Por último, sinalar que unha empresa poderá presentar varias solicitudes á mesma convocatoria sempre que se trate de tipoloxías de proxectos empresariais e roldas diferentes.