Claves para financiar e escalar empresas innovadoras. CDTI, NEOTEC e internacionalización

Un dos grandes retos para as empresas innovadoras é identificar os programas de financiamento que mellor se axustan á súa etapa e aliñalos coa súa estratexia de crecemento. Especialmente nas etapas iniciais, cando aínda se está validando a tecnoloxía ou o modelo de negocio, tomar estas decisións de forma axeitada pode resultar clave para avanzar con maior solidez.

Neste contexto, a Plataforma ONE organizou este webinar o pasado venres 17 de abril de 2026, centrado en ofrecer unha visión práctica sobre as liñas de financiamento do CDTI, o papel do programa NEOTEC na creación e consolidación de empresas de base tecnolóxica e as oportunidades vinculadas á cooperación tecnolóxica internacional.

Financiamento público para impulsar a I+D+i empresarial

O primeiro bloque do webinar dedicouse a contextualizar as principais liñas de financiamento da I+D+i empresarial que xestiona o CDTI. Emilio Iglesias Cadarso, xefe de área do Departamento de Promoción Institucional e Cooperación Territorial, explicou o papel do organismo como axente clave no apoio a empresas que desenvolven tecnoloxía propia.

Durante a súa intervención presentouse unha panorámica xeral dos instrumentos dispoñibles, os perfís de empresa aos que se dirixen e a importancia de aliñar o financiamento cunha estratexia tecnolóxica definida e cun plan de empresa coherente.

NEOTEC como impulso a empresas de base tecnolóxica

Dentro do conxunto de axudas do CDTI, o programa NEOTEC tivo un protagonismo destacado. Neste bloque abordouse o seu papel no apoio a pequenas empresas innovadoras, tal e como dixo Emilio Iglesias, “o obxectivo de NEOTEC é financiar a actividade de startups de menos de 3 anos que desenvolven tecnoloxía propia”.

Ademais, compartíronse algunhas claves sobre o encaixe do programa, o tipo de proxectos aos que se dirixe e a relevancia de aspectos como a definición do reto tecnolóxico, a planificación do crecemento e a coherencia entre a proposta técnica e a estratexia empresarial.

Eureka e partenariados europeos para medrar mediante a colaboración

O segundo bloque do webinar centrouse nos partenariados europeos e nas oportunidades que ofrece a colaboración tecnolóxica a escala internacional. Óscar Fernández Moyano, xefe do Departamento de Cooperación Tecnolóxica do CDTI, explicou o funcionamento de iniciativas como Eureka e Eurostars, orientadas a impulsar proxectos colaborativos entre empresas de distintos países, destacando instrumentos como os Clústeres.

Un dos instrumentos destacados da iniciativa Eureka son os Clústeres Eureka, que, como mencionou Óscar, “pretenden que a gran industria do sector no país actúe como tractor xunto cos países involucrados no clúster para impulsar proxectos de cooperación tecnolóxica no sector.”

Nesta parte ofrecéronse orientacións sobre o valor destes programas, o papel das empresas dentro dos consorcios e a importancia de aliñar os obxectivos tecnolóxicos cos requisitos das convocatorias europeas, especialmente cando se busca escalar a innovación máis alá do mercado nacional.

Internacionalización e cooperación tecnolóxica

O terceiro bloque estivo dedicado aos proxectos de cooperación tecnolóxica internacional, da man de Patricia Sánchez Pacheco, técnica do Departamento de Acción Tecnolóxica Exterior do CDTI. Durante a súa intervención abordáronse as opcións de cooperación bilateral, multilateral e proxectos unilaterais, así como o seu encaixe dentro da estratexia de internacionalización das empresas innovadoras.

Patricia puxo en valor o papel do CDTI como organismo de apoio á innovación empresarial, destacando o seu enfoque aberto e orientado ás necesidades reais da industria. Así mesmo, explicou que desde o CDTI se impulsa activamente a dimensión internacional das empresas tecnolóxicas, sinalando que “realizamos unha serie de accións que están encamiñadas a incrementar e dinamizar a cooperación tecnolóxica internacional, tamén a apoiar o despregamento internacional desas empresas tecnolóxicas, especialmente as pemes, e a detectar novas oportunidades de mercado para as empresas tecnolóxicas españolas”.

Esta parte do webinar permitiu achegar ás persoas asistentes á lóxica da cooperación internacional en I+D, destacando cuestións como a identificación de socios, a complementariedade tecnolóxica e a planificación de proxectos con impacto en mercados globais.

Experiencias reais de empresas beneficiarias de NEOTEC

Un dos bloques máis valiosos da sesión foi o dedicado ás experiencias reais de empresas beneficiarias do programa NEOTEC. Neste espazo, Germán Castillo, por parte de Kemchain Solutions, e Nieves Rúiz, en representación de Nanobots Therapeutics, compartiron o seu percorrido, as principais aprendizaxes obtidas e o impacto que este financiamento tivo no impulso dos seus desenvolvementos tecnolóxicos.

Na súa intervención, Germán Castillo puxo o foco na complexidade de incorporar determinados perfís clave demandados polo programa, como o persoal con doutoramento. Tal e como explicou, “non é doado atopar unha persoa que xa teña o doutoramento, estea dispoñible e acepte incorporarse a unha empresa cunha contratación a dous anos vista”, polo que recomendou que “se tes claro que te vas presentar a NEOTEC, é fundamental adiantar a procura do perfil de doutoramento o antes posible”.

Pola súa parte, Nieves Ruiz subliñou a esixencia da xestión administrativa do programa, especialmente no relativo á xustificación económica, sinalando que “a parte burocrática é complexa e fai necesario contar co acompañamento de consultoras ou de persoal especializado para poder afrontala con garantías”.

En conxunto, estes testemuños ofreceron unha visión práctica e próxima do impacto do programa, poñendo de relevo tanto a súa capacidade para impulsar avances tecnolóxicos como a necesidade dunha planificación anticipada e dunha estrutura de xestión axeitada.

Un espazo para resolver dúbidas e seguir avanzando

A sesión concluíu cun turno de preguntas no que se abordaron algunhas das principais cuestións formuladas polas persoas asistentes. O peche serviu tamén para poñer en valor a utilidade deste tipo de encontros á hora de achegar o financiamento público ao tecido empresarial innovador.

Este webinar súmase ao conxunto de contidos formativos da Plataforma ONE, deseñados para acompañar persoas emprendedoras e empresas nos seus procesos de crecemento, innovación e internacionalización.

Queres coñecer todos os detalles? Podes ver o vídeo completo do webinar e acceder paso a paso ás principais recomendacións compartidas durante a sesión.

Se non queres perder as próximas sesións, consulta a axenda de webinars da Plataforma ONE.