Claves da lei de startups que tes que coñecer

A lei 28/2022, do 21 de decembro, de fomento do ecosistema das empresas emerxentes, máis coñecida como lei de startups, representa un paso significativo para o impulso do emprendemento en España. Esta lexislación foi deseñada co obxectivo de estimular a creación e desenvolvemento de startups, á vez que promove a innovación, o investimento e a atracción de talento no sector empresarial.

A continuación debullámosche os seus principais compoñentes, e os beneficios que achega cada un deles.

Certificarse como startup

A lei de startups establece un marco legal para a certificación de startups. Esta certificación concede unha serie de vantaxes significativas ás empresas que cumpran cos requisitos e, por tanto, accedan a solicitar o seu certificado:

• Idade da empresa. O certificado está dispoñible para empresas que teñan 5 anos ou menos desde a data de alta no Rexistro Mercantil. No caso das empresas de biotecnoloxía, enerxía, ou industriais e daquelas que se determinen como pertencentes a sectores estratéxicos ou que desenvolvesen tecnoloxía propia deseñada integramente en España, este período poderá estenderse ata os 7 anos.
• Volume de negocio e balance. O volume de negocio anual da startup non debe exceder os dez millóns de euros. Este limiar está destinado a garantir que as startups sexan realmente empresas pequenas.
• Independencia. A startup debe ser independente, o que significa que non poderá estar controlada por outras empresas ou entidades en máis do 25% do seu capital.

A certificación como startup concede varios beneficios que pretenden reducir a carga fiscal destas empresas, apoiando o seu crecemento nos inicios. Aínda que esta certificación ten máis melloras para as empresas que o reciban, estes son os beneficios fiscais máis destacados:

• Redución do imposto de sociedades dun 25% a un 15%. Isto manterase durante un prazo de 4 anos, a condición de que se manteña a condición de empresa emerxente. 
• Aprazamento de débedas tributarias. As startups certificadas poderán aprazar o pago da débeda tributaria correspondente aos dous primeiros períodos impositivos nos que a base impoñible do imposto sexa positiva.
• Mellora da política retributiva das stock options. Antes as stock options que recibían os empregados das startups tributaban a partir dos 12.000 euros no IRPF. A lei de startups eleva o importe da exención dos 12.000 € aos 50.000 €, o cal trata de incentivar a entrega de stock options por parte das startups aos seus equipos.
• Mellora das deducións para investidores. A cantidade máxima anual de dedución increméntase de 60.000 € a 100.000 €; a porcentaxe de dedución elévase do 30% ao 50%.

Se queres coñecer máis en detalle o proceso de solicitude do Certificado para startups, ou iniciar os trámites parta solicitalo, podes ir ao noso trámite “Certificase como startup”, ou botar unha ollada na web de ENISA, a entidade encargada de conceder esta certificación.

Atracción de investimento e talento internacional

Outro da obxectivos clave da lei é atraer investimento e talento internacional a España. Para logralo, a lei inclúe as seguintes medidas:

• Visados para nómades dixitais. Créase unha nova categoría de visados, con obxecto de atraer aos chamados “nómades dixitais” ou perfís altamente cualificados que decidan residir en España mentres traballan para si mesmos ou prestan servizos a empresas estranxeiras.
• Ampliación de períodos de residencia para investidores, emprendedores, traballadores altamente cualificados e estudantes estranxeiros. A lei de startups aumenta o prazo de residencia de 1 a 3 anos con posibilidade de ampliar a 5 (de 1 a 2 anos no caso de estudantes).
• Simplificación administrativa. Simplificaranse os trámites para solicitar o NIE de forma telemática.
• Simplificación de trámites para os investidores estranxeiros. Xa non necesitarán dispoñer de NIE, senón de NIF, que poderán solicitar a través dun procedemento simplificado e telemático.

Podes consultar como solicitalo na nosa sección de trámites para investir e traballar en España.

A lei de startups en España marca un avance importante no apoio ás empresas emerxentes e a promoción da innovación. A certificación como startup e os beneficios fiscais asociados proporcionan un incentivo significativo para que as empresas que cumpran os requisitos accedan a beneficios especiais. Ademais, os esforzos para atraer investimento e talento internacional son fundamentais para o crecemento e a competitividade do ecosistema de startups en España. A través desta lei sentan as bases dunha contorna regulatorio máis favorable ao emprendemento innovador.

Se queres saber máis, convidámosche a botar unha ollada á nosa páxina dedicada á “lei de startups”, onde debullamos aínda con máis detalle os contidos esenciais.