Un marco normativo favorable ás startups: as 5 leis que tes que coñecer

Un marco normativo favorable desempeña un papel fundamental no desenvolvemento do ecosistema de startups en España. Proporciona as bases legais e reguladoras necesarias para impulsar a innovación, fomentar o investimento e facilitar a creación e o crecemento de novas empresas. Ao ofrecer vantaxes fiscais, simplificar procedementos burocráticos e promover o investimento en I+D, este marco permite non só atraer persoas emprendedoras e capital, senón tamén fomentar a competitividade e a xeración de emprego.

Lei de startups: Fomento da innovación empresarial

A Lei 28/2022, do 21 de decembro, de fomento do ecosistema das empresas emerxentes, popularmente coñecida como lei de startups é un compoñente do marco normativo español que busca impulsar a creación de empresas innovadoras. Aprobada en 2022, proporciona un conxunto de beneficios e medidas específicas para as startups, tales como:

• Réxime fiscal favorable: posibilidade de gozar dunha tributación reducida sobre os beneficios xerados nos primeiros anos de actividade.
• Medidas para facilitar o acceso ao financiamento: facilidades para acceder ao financiamento a través de medidas como o réxime de equity crowdfunding e a simplificación dos procesos de investimento.
• Marco laboral máis flexible: posibilidade de obter beneficios na contratación de persoal, ofrecendo un marco flexible para a xestión de recursos humanos. 

Na sección de lei de startups poderase profundar con máis detalle sobre esta lexislación.

Lei crea e crece: Simplificación de procesos empresariais

A Lei 18/2022, do 28 de setembro, de creación e crecemento de empresas, coñecida como a lei crea e crece, ten como obxectivo facilitar a creación de empresas e incentivar o investimento en startups a través da simplificación de trámites e requisitos fiscais. Algúns dos aspectos máis destacados desta lei inclúen:

• Redución de trámites burocráticos: posibilidade de realizar os trámites de creación e rexistro de empresa de maneira rápida a través de medios telemáticos.
• Loita contra a morosidade: impulso para a adopción da factura electrónica entre empresas e autónomos facilitando unha maior rastrexabilidade e control de pagos.
• Impulso do crecemento e expansión do tecido societario: promoción ao investimento en I+D e o desenvolvemento tecnolóxico.

Lei de emprendedores: Estímulo á iniciativa empresarial 

A Lei 14/2013, do 27 de setembro, de apoio aos emprendedores e a súa internacionalización, coñecida como a lei de emprendedores, é fundamental para simplificar a creación de empresas e fomentar o espírito emprendedor. Algúns dos aspectos máis destacados desta lei son:

• Visados para emprendedores estranxeiros: simplificación do trámite para a obtención dos permisos de residencia.
• Apoio ao emprendemento feminino: promoción da igualdade de xénero no emprendemento.
• Facilita o investimento estranxeiro: simplificación dos procedementos para atraer investimento estranxeiro.

Última lei de autónomos: Melloras para os traballadores autónomos

Desde que se aprobase a Real Decreto Lei 13/2022, os traballadores por conta propia ou autónomos contan cunha serie de mellora, fortalecendo a súa estabilidade financeira e simplificando os trámites administrativos para os traballadores autónomos. Algunhas das disposicións desta lei son:

• Redución de cargas fiscais: incentivos fiscais para os traballadores autónomos, tales como a bonificación de cotas durante o descanso por nacemento e adopción.
• Ampliación de dereitos sociais: melloras nas prestacións e dereitos sociais para os traballadores autónomos, permitindo, por exemplo, compatibilizar a percepción mensual da prestación por desemprego co traballo de autónomo.
• Flexibilidade na cotización: posibilidade de elixir a base de cotización da Seguridade Social. 

Nova lei concursal: Facilitando a reestruturación empresarial

A lei concursal 16/2022 ten como obxectivo simplificar e axilizar os procesos de reestruturación empresarial e reducir a liquidación de empresas con dificultades financeiras. Algunhas das reformas inclúen:

• Fomento dos acordos extraxudiciais: facilita a negociación de débedas e acordos coas persoas acredoras antes de declararse insolventes a través dun instrumento preconcursal dirixido a evitar a insolvencia.
• Protección do emprego: medidas para preservar o emprego e garantir a continuidade das empresas que pasan por dificultades financeiras, pero que son susceptibles de xerar beneficios.
• Segunda oportunidade: maior flexibilidade para que as persoas emprendedoras e empresarias teñan unha segunda oportunidade despois dun fracaso empresarial, permitindo que o debedor poida eludir a liquidación do seu patrimonio se presenta un plan de pagos, o que permitiría manter a súa actividade e bens. 

En resumo, en España estableceuse un marco normativo que apoia a creación e o crecemento de empresas, en especial as startups e empresas innovadoras. Estas leis non só simplifican os procedementos e fomentan o investimento, senón que tamén promoven a innovación, a igualdade de xénero e a sustentabilidade no ecosistema empresarial.